Chelsea ka njoftuar se Frank Lampard është emëruar trajner deri në fund të sezonit.

Pas shkarkimit të Graham Potter ‘Blutë’ e Londrës mbetën pa trajner.

Sot ata kanë njoftuar që në stol deri në fund të sezonit do jetë Frank Lampard, transmeton lajmi.net.

“Jemi të lumtur të mirëpresim Frankun në Stamford Bridge. Frank është një Hall of Famer në Premier League dhe një legjendë e këtij klubi. Ndërsa vazhdojmë procesin tonë të plotë dhe shterues për një trajner të përhershëm, ne duam t’i ofrojmë klubit dhe tifozëve tanë një plan të qartë dhe të qëndrueshëm për pjesën e mbetur të sezonit. Ne duam t’i japim vetes çdo shans për sukses dhe Frank ka të gjitha karakteristikat dhe cilësitë që na duhen për të na çuar në vijën e finishit.

Ne kemi një lojë të rëndësishme kundër Wolves të shtunën dhe më pas do ta kthejmë vëmendjen tonë në çerekfinalen tonë të Champions League në Madrid javën e ardhshme. Ne të gjithë do t’i japim Frank mbështetjen tonë të plotë pasi synojmë të marrim rezultatin më të mirë të mundshëm nga të gjitha ndeshjet tona të mbetura”, tha pronari i klubit, Todd Boehly.

Lampard u rikthye në ‘Stamford Bridge’, ku më parë kishte fituar si lojtar Premier Ligën në tre raste dhe Ligën e Kampionëve në Mynih.

Ai e drejtoi klubin për 84 ndeshje, duke përfshirë edhe në një finale të FA Cup.